CLICK HERE FOR BLOGGER TEMPLATES AND MYSPACE LAYOUTS »

أنــــــا

My photo
انا اكتر من شخصية و كل ما فيّا بيحلم بيك

Monday, September 8, 2008

ابتسامة جديدة

إعتذار: حبيت اودعكوا بالبوست ده لحين عودتى للنت تانى بعد شهر رمضان ان شاء الله
لان الوقت عندى مضغوط جدا
بعتذر لأى حد تأخرت فى التعليق على مواضيعه و انتظرونى بعد رمضان
تحياتى للجميع
:)
/
\
**إبتسامة جديدة**


,, أدركت اليوم أن ثمّة شىءٍ قد تغير
.
.
عندما وقفت أمام مرآتى الصغيرة .. وأمعنتُ النظرْ
عرفت أن الطفلةُ قد فكت جدائلها
و ألقت بالشرائط الوردية فى ركن الذكريات
... بعدما اختارت لنفسها قصة شعرٍ جديدة
وملابس جديدة
و ملامح جديدة
و حياة بكل ما فيها ... جديدة

ما زالت تنظر إلى الماضى بنوع من الإشتياق ... مع وعدٍ بالغياب الأبدىِّ
ما زالت تبتسم لطفولتها

ما زالت رغم كل شىء تبتسمْ
! لكنها ابتسامةٌ جديدة

Monday, September 1, 2008

الحقونى بقطن و شاش ... عازفة الأوتار اتبطحت يا رجالة


كل سنة و انتوا طيبيييين يا بشر
رمضان كريم على الجميع و ديما متجمعين فى الخيمة البلوجرية الحلمنتيشية دى
قولوا آمين يلا
د. مروة المعداوى (قباحة سابقاً) مهانش عليها ان دكتور عمرو يحدفها بطوبة من غير ما تحدفنى بيها
ازاااااى و دى تيجى ؟؟؟؟
يا ندوّن سوا ... يا نتبطح سوا
لأ و البطحة جيالى مركّبة ... اتنين دكاترة اتفقوا عليا
يلا انا وعدت مروة انى مش حدعى عليها علشان هى متظبطة فى النبطشيات اصلا و المرضى جابولها الهسهس و الاستبحس
و الضرب فى الميت حرام بردو
و بعدين قباحة ليها معزة خاصة فى قلبى لانى كتير من الاوقات بلاقى نفسى فيها و فى كلامها
اه و الله ولا ليكو عليا يمين
بس انا مش عسولة اوى زيها كدة
//
//
//
نبدأ بقى نحسس على البطحة و نخيطها غرزة غرزة
و آدى د. مروة على يمينى .... و د. عمرو على شمالى
عمالين يقولوا كلام بالانجليزى كدة ... اعدم نفسى لو فاهمة منه حاجة
استنوا سمعت حاجة من الكلام بتاع البنى ادمين بتاعنا
رصاصة ؟؟؟
رصاصة ايه يا مروة ؟؟
هو الموضوع كان فيه رصاصة ؟ احنا متفقناش على كدة
/
\
عمرو ماسك ملقاط طوييييييييل و عمال بيقّلب جوة فى راسى
والنبى يا دوك. بالراحة لحسن الدماغ تعبانة لوحدها مش ناقصة يعنى
يلا انا حسيبهم هما يقلبوا و يلغوّصوا جوة و انا حجاوب على التاج رصاصة رصاصة .... قصدى سؤال سؤال
.
.
أول رصاصة
بدأت تدون امتى و دخلت عالم التدوين ازاى ؟؟؟ اطربنا يا معلم
.
.
بدايتها سؤال كدة جاى على الوجيعة
مش كفاية الوجيعة اللى عمالين يلعبوا فيها فى راسى
انا حقول كل حاجة ...
انا سكتى مع المدونة طويلة شوية
بس استنوا اشوف اول مدونة عملتها امتى
اول مدونة يا بشر كانت بإسم (اوتار ممزقة)
هى هى نفس الاوتار اللى بعزف عليها دلوقتى :) بس وديتها عند الرفة شبكهالى فى بعضها
كانت على موقع مكتوب و ده اللينك بتاعها
http://menna.maktoobblog.com/
و اول تدوينة فيها بتاريخ 11 حزيران 2007
بصراحة انا مبعرفش فى حزيران و بزيران و الحجات دى
ياريت حد يحسبلى كانت من ايد بقى و يقولى
مع الوقت سبتها لانى كنت مشرفة فى منتديين على قسم الشعر فكان دخولى بطبيعة الحال قليل عليها
و بعد فترة طويلة اتعملتلى مدونتى الحالية كإهداء من شخص كنت اعرفه من خلال المنتديات
بس كانت بلينك تانى غير اللينك الحالى
وكنت اختارت ليها اسم ملامح امرأة عادية
و بعدين غيرته لعازفة الأوتار
و بقت بالشكل الحالى
و اول تدوينة فى عازفة الأوتار بتاريخ 3 فبراير 2008
و كانت من كتاباتى بس الادراج بواسطة الشخص اللى عملى المدونة بعنوان
(صورة مهتزة )
اظن كدة انا جبت الديب من ديله و ديل صحابه و جرانه و العيلة و الجدود بتوعه

تانى رصاصة
ايه كان انطباعك فى البداية ؟؟
.
.
و الله يا مروة انا الموضوع مكانش جديد عليا لانى كنت متشردة فى المنتديات قبل كده
و لفاها شارع شارع و حارة حارة و رصيف رصيف
بس الجديد اللى حسيته انى بلعب فى ارضى
حلوة بلعب فى ارضى دى ههههه
يعنى حسيت انى بكتب و برتب و بظبط الصفحة زى ما انا عايزة
و اللى بيدخل هنا بيدخل مخصوص علشان جنابى مش زى المنتدى
و فرقت كمان انى تخلصت من صفتى الاشرافية هنا و بقيت بتعامل على طبيعتى اكتر بدون ادوات تحكم ولا توجيهات ادارية و لا قناع لازم البسه علشان اقدر اسيطر على القسم و حدود فى التعامل و ضوابط فى الاسلوب اللى بتكلم بيه لانى مشرفة و ميصحش اعمل كذا و كذا علشان الاعضاء يعملولى حساب
ده حسيته اكتر فى المدونة هنا لان مدونتى الحالية تعتبر اول تفاعل ليا حقيقى فى عالم التدوين على عكس المدونة الاولى اللى كان تفاعلى فيها قليل جدا بسبب انشغالى بالمنتدى
و فى احساس كمان حسيته دلوقتى يامروة انتى و عمرو
ان اديكم بدأت تتقل اوى فى راسى و بدأتوا تلغوصوا بقلب اوى
الى جانب ان البنج اللى اديتوهولى مش عامل اى حاجة و الناس اللى مكتفنى اديهم تقيلة اوى و حاسة ان اديا و رجليا بدأوا يزرقوا
و انتى شغاله تقوليله قلب يا عمرو و هو يقولك استنى اجيب من تحت علشان يتقلب معاهم
و حاسة انك شوية و حتقوليله حطها على النار و زودلها الملح شوية
بالراحة يا جدعاااااااااان دى دماغ تعبانة خلقة
فى الوقت ده لقيت زغدة قوية و مستقوية من الدكتورة مروة فى دراعى
و كان ملهاش غير معنى واحد .... اسكتى احسنلك
و انا مفيش ادامى غير انى اسكت و الهى نفسى فى الاجابة على الغرز اللى فاضلة
.
.
ثالث رصاصة
مين اكتر واحد بتحب تعليقه على بوستك الجديد ؟؟
.
.
بصوا انا بحب كل التعليقات بصراحة و اى تعليق بعتبره شرف ليا و بفرح بيه جدا
لانى بحب كل ضيوف مدونتى و ده بجد و الله مش مجاملة
بس فى تعليقات بتلمسنى شوية زى تعليق شهرزاد و تعليق فارس بلا جواد و برنسس دودو
و ahmed_k و تامر الحسينى و فى تعليقات لذيذة و على راسها كيكى طبعا بتاعة عوووووو
و يمكن اكون نسيت ناس غصب عنى
بس بشكل عام كل التعليقات ليها مكانة فى قلبى هى و اصحابها
اى اى ... حاضر فهمت
و طبعا ملائكة الرحمة د. مروة و د.عمرو
هما الخير و البركة هو احنا لينا غيرهم
يا مدلعينا يا مشخلعينا
بالراحة و النبى على نافوخ منة
.
.
رابع رصاصة
ايه اهم حاجة اتعلمتها من عالم التدوين ؟
.
.
اتعلمت لما الاقى تيجان بتتحدف اوطى أو آخد ساتر
و لما تيجى الطوبة فى المعطوبة مخليش مروة و عمرو هما اللى يخيطولى الغرز :))
.
.

خامس رصاصة
حاسس ان التدوين له تأثير ؟
.
.
ااااااااااااه حااااااااااسس طبعا
لو انا مش حاسس مين حيحس يعنى ؟؟
ده ليه تأثير بيسمع فى الجسم كله خاصة لما البنج يكون مضروب و الدكاترة اديهم خفيفة كدة

هو التدوين ليه تأثير من الناحية الشخصية
يعنى هو افراج عن مشاعر الواحد المكبوتة و مشاركة وجدانية جميلة بتساعدنا على تخطى الكتير من العقبات اللى بنواجهها فى حياتنا
و بينمى حجات كتير فى الانسان
يعنى اسلوب الكتابه مع الوقت بيتغير
اللباقة فى الكلام كمان بتكون احسن
و من خلال المرور على مدونات اخرى بناخد خبرات و سعات معلومات مهمة جدا
لكن على مستوى الراى العام بقى و و الحجات دى
فاعتقد انه وسيلة ضعيفة جدا ده لو كان ليه تاثير
لكن ليه تاثير فى نشر فكر معين المجتمع عنده استعداد اصلا لتقبله
......
حاضر حاضر حدخل على اللى بعده متزقوش انتوا الاتنين
.
.
ساااادس رصاصة
تهدى البطحة ... قصدى التاج ده لمين ؟
.
.
smilyrose وردشان
princess dodo
engy
شهرزاد
كيكى
liitle lady
تامر الحسينى
و البند ده قابل للتعديل بقى
يمكن افتكر حد عايزة ادبسه ولا حاجة
( ضحكة شريرة )
/
/
/
/

ااااااااااااااااااااااااااااااااااااااااااااااااااااااااااااى
خلاص و النبى يا مروة مش حقف فى سكتك و انتى بتحدفى تيجان تاااااااانى
طاخ طيخ طوخ
بونج بونج
بوووم

عمرو و مروة فى نفس واحد
احنا عملنا اللى علينا و الباقى على ربنا
( ضحكة شريرة بردو)
.
.
: امضاء
المرحومة عازفة الاوتار الممزقة