إنتهى الحب

كان بيلعب من زمان

لمّا حسسها بأمان

عاشت الوهم بجنون

صدّقت إحساس جبان
.*.

كان بيرسم الشجاعة

كل ثانية و يوم و ساعة

لمّا قالوا عليه مخادع

فكرتها يدوب إشاعة
.*.

هو فعلاً كان حنون

حبته ... بس بجنون

مستحيل كانت تفكر

إنها ممكن تهون
.*.

إستغل براءة فيها

و حُب كان باين عليها

كان بايعها رخيص فـ نفسه

و هى فكراه مشتريها
.*.

و ابتدت يوم بعد يوم

تسهر و تعد النجوم

شافت النور فى السما

بس مشافتش الغيوم
.*.

فى التحدى كان جرىء

غمّضت .. مشيت طريق

سلّمت من غير كلام

و اتولد إحساس برىء
.*.

من هنا بدأ الخداع

و اترسم طريق ضياع

كانت أكبر صدمة ليها

لمّا حست انه باع
.*.

صمتها عرف الكلام

صرخة منها قالت : حرام

مش حهين إحساسى تانى

مش حسلّم للغرام
.*.

و انتهى الحب الكبير

لمّا قتله جرح أكبر

حب كان من غير مصير

و الخداع ديماً بيقدر
.*.*.*.