CLICK HERE FOR BLOGGER TEMPLATES AND MYSPACE LAYOUTS »

أنــــــا

My photo
انا اكتر من شخصية و كل ما فيّا بيحلم بيك

Monday, November 15, 2010

شىء ملموس



جرب تنسى
انك عايش وسط الناس اللى محاوطينك
اللى بتصرخ مهما بتصرخ مش سامعينك
جرب تجرى و ترمى سنينك فوق احزانك
كفنهم ...
احرقهم ...

انساهم و انقذ انسانك


جرب تقلع جلد زمانك
و البس جلد جديد مش جلدك
لكن متفصّل علشانك

ازرع حلمك جنب اخواته ... جايز يطرح
جايز تسمع صوت دقاته
جايز يهرب ... و يموت زى اخواته ما ماتوا

عايز تبكى ؟ ابكى براحتك
دمعك مش حيموت فوق خدك
حيموت فوق جلد مهوش جلدك
حتى اللى بيبكى مهوش انت
ما انت معدتش شىء ملموس

Saturday, January 30, 2010

حلوة بلاااااادى








مبرووووووووووووك يا مصر
يا أم الدنيا







Monday, December 28, 2009

عيش لو لحظة مش مدفون


ليه عايش جواك مخطوف؟!

قلبك لسة ماليه الخوف

متغرب .... هربان من ايه ؟؟

و بتحلم انك تلاقيه ..!!

لساك بتفكر فعنيه ؟!

و فسرك بتنادى عليه

الماضى ماليك من جواك ....

مع انه فلحظة بينساك

ليه مش قادر يوم تنساه ؟

ليه بتحن لبكرة معاه ؟

فى ايه فـ ملامحه بيغريك ؟

قولّى فى ايه بينادى عليك ؟!

طب تيجى نحاول نرجعله ؟

صوت الماضى معاك ... إسمعله

كنت بتكره صوت انفاسك ...

لما خيانته تطول إخلاصك

خوفك كان غرقان فـ ظنونك

حتى خيالك ... كان بيخونك

كان العشق فقلبك تربة ...

رغم دفاها بتطرح غربة

فاكر لمّا الدمع عماك ؟!

عن حيرة بتكبر جواك ...

فاكر لما صحيت من حلمك ...

على صوت خطواته الهجراك ؟

صوتها بدأ يملاك بجنون ؟؟

انتفضت جواك الذكرى ؟

إرجع للحاضر و انساها

قبل ما تملى عليك الكون

إرجع .. و اتحرر مـ الماضى

عيش لو لحظة مش مدفون



قلمـ/ منه مرتجى

عازفة الأوتار

Sunday, November 22, 2009

...........................................




Sunday, November 15, 2009

بلدنا فى القلوب متشالة

مش جاية اقول شعر ولا قادرة اقول حاجة بصراحة
بس فرحااااانة
و يااااارب يااااااارب الأربع الجاى نفرح نفس الفرحة دى
لأ اكيد حتكون فرحة اكبر منها لما نتأهل إن شاء الله
مبروووك لمصر و لينا و لكل ذرة تراب على أرض مصر
























Sunday, October 18, 2009

نص حالة

انا مسافرة فترة و ممكن ميكونش فى عندى نت
بعتذر عن التأخر فى الرد لفترة
**********

هى كانت نص حالة
مش بريئة و مش مدانة
ايوة كانت نص فرحة ... نص دمعة
نص احساس بالخيانة
و الحقيقة ان احنا كنا ... نص حالة
نصنا احساس مشوه بالكمال
حب لكن جوة منه ألف "يمكن" و "احتمال"
.
حق شرعى بنسرقه من تحت اعتاب القانون
قاضى بيطبق عدالة
بألف شكل و ألف لون
شمس خايف منها نورها
لا النهار يطلع ظنون
نجم تايه جوة ليل
و القمر مكتوب غياب
كلمة كارهة حروف سطورها
جوة صفحة العتاب
.
والغياب ؟
الغياب كان فصل محفور جوة صفحة البداية
فصل محذوفة نهايته من تفاصيل الحكاية
.
و الفراق؟
الفراق ده باقى قصة
تايهة من فصل النهاية
جاية بكل الضعف بعلن
ان دى يا نص حبى تبقى صفحة النهاية

قلمـ/ منه مرتجى




Tuesday, September 22, 2009

مقاس الضحكة


مقاس الضحكة مش أدك
و تمثيلك مهوش متقن
عيونك رغم ضحكتها
ممنعتشى سيول الدمع عن خدك
... و لمعة نظرتك لسة
ّكما هى
بنفس القوة بتحارب ... تفاصيل فرحتك بيّا
/
مفيش غيرى قدر يدخل موانيكى
و لا غيرى فيوم يجروء يآمن خوف ملى عنيكى
... مفيش غيرى
حيقدر يملى جواكى
فراغ هجرى .... و حرمانك
و لو حتى سمحتيله يجرب غزو أحضانك
حتتراجعى ...
لأنى عارف انه مش بإمكانك
فتمثيلك ولا أثر فيوم فيّا
مفاتيحك ... حتفضل سر فإديّا

قلمـ/منه مرتجى

Saturday, August 8, 2009

الناجح يرفع ايدووووووو

أول مرة اعرف يعنى ايه الناجح يرفع ايده النهاردة
لما لقيت رساله من أحد المعيدين على الميل
بتقول ان النتيجة طلعت
و انا كنت عاملة فيها السبع اللى مش بيهمنى حاجة
جريت زى المجنونة على الشنطة بتاعتى
و طلعت المحفظة و انا قلبى بيدق بيدق بيدق
لما حسيت انه حينط برة القفص الصدرى اللى محبوس فيه بقاله سنين
فضلت ادور فى المحفظة لحد ما اخيرااا لقيت رقم الجلوس
اخدته و رحت على الكمبيوتر
فتحت موقع الكلية
وما استنيتش اعرف اذا كانت فعلا النتيجة طلعت ولا لأ
دخلت على قسم النتايج
حطيت رقم جلوسى و طلبت النتيجة
طلعلى ان مفيش بيانات محفوظه عندهم بالرقم ده
اوبسسسسسسسس
قلت فى نفسى : يا ليلة مش فايتة
انا كنت عارفة ان انا حفضل طول عمرى اسيرة الكلية الغريبة دى
لأ و كمان الكلية تخلت عن انتسابى ليها
يعنى بقيت فى الشارع و الحمد لله بعد سنين الشقا دى كلها
قلت : اعوذ بالله من الشيطان الرجيم
و فضلت اجرب ... بلا جدوى
لحد ما دخلت رقم جلوس غير رقمى
طلعتلى نتيجة طالب تانى
قلت دى الحكاية جد بقى و الكلية طلعت النتيجة و مش معترفة بيا
بس الحمد لله قلت اجرب مرة اخيرة و كتبت رقمى تانى
طلعتلى النتيجة و لقيت نفسى ناجحة نضيييف الحمد لله
و طبعا حسيت ساعتها يعنى ايه الناجح يرفع ايده
بس انا بصراحة رفعت ايدى .... و رجلى
!!!!!حد عنده مانع ؟

Saturday, July 25, 2009

من غير خجل

من غير خجل عرّى الجسد
عرّيه ولازم ترقصى
اتنفسى
و اتحركى من غير علل
خلى القيود فى سجن خجلك تتقتل
انا بعشقك .. على فطرتك
زى ما امك ولدتك
انتى انا ... و الحب حلل متعتى فيكى و حلل متعتك
ماتصدنيش ... و ماتبعديش بينا المسافات عن كدة
يا عمرى مش عايز حواجز او قيود
يوم تحجبك عن حضنى ... لما أحضنك
و حتفضلى ف عينى الملاك .. و الطهر عنوان رقصتك
شايف ف جلدك سكتى
فكّى ضفايرك ... ضللى على خطوتى
فى طهر ارضك و اسمحيلى اعشقك
والعشق يعلى كل يوم
عن كل أنواع المبادئ والقيم
إبتدى
أو إسمحيلى ...أبدئك
حبينى بجنون
كسّرى كل القيود
الحب مجنون يا أنا ... و الجنون مالهوش حدود
لو لسه ناوية تفكرى
سامحينى مش حقدر أكون
ليكى الوطن
طول ما انتى خايفة تقربى
طول ما انتى منى بتهربى
يبقى اهربى
و اتغربى
و اتنّدمى على حب كان .. لكنه مات قبل الأوان
ابكى على جثمانه لما أبتِعد .. و شيلى ذنبه للأبد

استنى -
استنى اياك تبتعد
انا ليك حكون و للأبد
من غير قيود و بفطرتى
رح أكون أنا
و لا عمرى حشعر بالخجل
طول ما أنت سترى وضلتى
/
و يمرشهر وبعده شهر
و البطل عمّال بيلعب لعبته
و جلدها يوم بعد يوم
يرخص ... ويفقد زهوته
/
ماغصبتكيش -
فماتعيشيش دور الملاك
خليكى زيى .. وإعلنى إنك شيطان
والحب؟
الحب ده مخلوق برئ
وجرئ
وأطهر من ميلاده ورا البيبان
ما تلوثيش الحب ف علاقة ابتدت
علشان تموت
من بعد حضن وقبلتين
لو كل من هاود شيطانه فضل ملاك
يبقى انتى طاهرة و بجناحين
انتى اللى بعتى بالرخيص
و حجتك .. انى اشتريت
انا بعترف انى ابتديت
ودخلت سوق المتعه شايل كلمتين
وحضن زايف ... وابتسامة
يعنى التمن
يعنى اشتريت
ما هو أصل ف تجارة السلع
اللى يلاقى شىء رخيص و ميشتريش
بيكون عبيط
وانتى عرضتى سلعتك
ع اللى ما كانش ف يوم عبيط

Saturday, May 16, 2009

كل عام و انت بخير - الجزء الأول





النص من جزئين
هو دويتو كان ليا الشرف بالمشاركة فيه
و اسمحوا لى بعرض الجزء الأول اللى كان عن لسانى




زى النهاردة فكل عام
انا كنت بحضن شمعتك
همسة ضلوعى تقولّها : مستنياكى فكل عام
تنوريلى دنيتى بنور خطاكى ف سكته
تكّبريه و تكبّرى .. فرحة عنيّا بضكته
كانت بريئة و صدقت
أحلامى زيّى و سمعتك
مشيت و طالت سكتك
و الشمعة فجأة اتحولت
لديب بياكل فرحتى
عيونه زيّك طيبة
و حنيّنة
نفس القناع اللى مسح يوم دمعتى
.
زى النهاردة .. بعترف
كان احتفالى بشمعتك
هو احتفالى بدفنتى
خطاوى موت .. زرعها قلبى ف سكتى
وانا النهاردة ... جايّة بردو أحتفل
جايّة و بفتح خطوتى
بس قلبى بيتقّفل
جاية أقولك
كل عام و الغدر فيك عايش بخير
كل عام تعيشه ميّت
ويّا قلبك الضرير
جاية أهنّى
و بطريقتى ... ليك حغنى
.. بس حاسب
صوت غنايا ... لحنه نار
قوة الحب اللى جارحه
فجرّت بركان دمار
جاىّ يكسر شمعتك
جاىّ يقتل فرحتك
البراءة اللى فعنيّا اتعلمت كل الذنوب
...سكينة الغدر اللى فيّا غرستها
لازم تدوق من جرحها علشان تتوب
/
\
كل ده انا كنت بحلم اعمله
فيلم موتك.. كنت بحلم اكمله
معرفش مين غيّر نهايته و شدنى
على صورة ليك
لقتنى بحضنها اوى و ببوس عنيك
كانى بحضن شىء بيكبر حبه فيّا
معرفش ليه رغم الألم
جريّت أوام عليك عنيّا
عشان تقولك : كل عام و الحب ليك
و الجرح ليّا


Saturday, April 25, 2009

مش حسمحلك



مش مسموح لعيونك ابدا
ترسم نبض الخوف جوايا
و لا مسموح للدقة تخونى
وتعزف لحن الموت وياك
ايوة زمان كنت بتبهرنى
صدق قناعك لحظة سحرنى
لكن لازم اقول لغرورك

مش حسمحلك يوم تكسرنى

***
مش مسموح للدمع يعاند
صبرى و يبكى فـ جوف الليل
ولا مسموح لوجودك فيّا
يجعل نبضى فقلبى عليل
حبك كان اجمل اسطورة
تهت و تاهت فيها سنينى
لكن لازم أقول لحكايتك

مش حمسحلك يوم تمحينى

Tuesday, March 10, 2009

أهديك خنجراً




..... أهديك خنجراً

... لتقتل به آخر جنين حملته أحشائى من حبك

كى لا يعيش .... و يلحق به عار حبٍ طاهرٍ

!! لوثه خداعك

Friday, February 20, 2009

بعيداً عن غزة

لأننا شعوب " كلامنجية " و أنا شخصياً ضقت ذرعاً بتلك الصفة التى تشربتها عروبتى
و كثيراً ما استشاط نشاطها بقوة عندما تضرب غزة
لذلك سأعود بصمت .... بلا شعارات ولا أمل طارح فى سن القلم
سأعود لكلامنجيتى .... و لكن بعيداً عن غزة

Tuesday, January 13, 2009

إلى أن تعود غزة


المدونة مجمّدة
.
.
إلى أن تعود غزة
إلى أن تعود غصون الزيتون المفقودة ... تحت أنقاض غزة
إلى أن تموت الدموع المستنفرة ... فى عيون أطفال غزة
إلى أن يأتى الليل بلا قصفٍ على ضواحى أهل غزة
إلى أن نعود .... و تعود غزة


Friday, December 19, 2008

!!! فى أحضان الذئب

بعتذر عن تغيبى المتكرر و المتواصل بس ظروف الشغل دلوقتى بتحكمنى ، و اتمنى ان ميكونش حد زعل من تأخرى فى الرد عليه هنا او فى الوجود فى مدونته ، امتحانى قرب ياريت تدعولى بقى

و عايزة رأيكوا فى القصيدة دى بصراحة متناهية لانى احتمال ادخل بيها مسابقة

فهل رأيكوا انها تصلح ولا لأ ؟


...أحبُ الذئبَ و الصحراءُ
فى عينيهِ تسحرُنى
... نشازٌ بين ألحانى
وخوفٌ منه يملأُنى
... أشُمُ ضراوةَ الأزهارِ
و الغربانُ ما زالت تُلاحقنى
... ففى أحضانِ ذاكَ الذئب
عشقُ الخوفِ يملكنى
... صخورٌ فى رمالِ الحب
تعشقهُ و تعشقنى
... و تاريخٌ من القسوة
يساعدهُ و يُرهقنى
... أذوبُ أمامَ قسوتهِ فيجذبنى
بوحشيةْ ؛ يراقصنى يداعبنى
... أحبُ جنونَ إلحاده
و ذاكَ العنفِ يأسرنى
... و يتباهى غرورُ الذئب
و يكتبُ إسمى عاشقةٌ من الضمنِ
... أعرفُ أنهم كُثرُ ؛ و أتألمْ
يزيدُ غروره ولعاً و يقتلنى
... نعم ثوراتى واهيةٌ و غاضبةٌ
جنونُ الخوفِ يسحقنى
... أخــافُ على ذكراى أن تذبل
و ذكرى أُخرى تمحقنى
... فيا ذئبى , كفاكَ تجارةٌ فيَّا
أحاولُ صَدَّ أشواقى ، فساعدنى
منة الله مدحت